मेचीनगर । विएण्डएस क्रिकेट क्लबको आयोजनामा प्रथम मेचीनगर कप टि–१० क्रिकेट प्रतियोगिता हुनेभएको छ ।
यहि चैत २८ गतेदेखि ३० गतेसम्म हुने प्रतियोगितामा नेपाल र भारतका गरी १६ टिमको सहभागिता रहने आयोजकले आज पत्रकार भेटघाट मार्फत जानकारी दिएको छ । मेचीनगर वडा नम्बर – ८ को सहयोग रहने प्रतियोगितामा प्रथम हुनेलाई नगद रु ५० हजारसहित ट्रफी र मेडल प्रदान गरिनेछ भने उपविजेतालाई नगद रु २५ हजार ट्रफी र मेडल प्रदान गरिने प्रतियोगिता आयोजक समितिका सदस्य समीर श्रेष्ठले जानकारी दिए ।
क्रिकेट खेलको विकास तथा स्थानीय खेलाडीलाई प्रवद्र्धन गर्ने उद्देश्यका साथ उक्त प्रतियोगिता आयोजना गरिएको अध्यक्ष भूपाल बुढाथोकीले जानकारी दिए ।
उक्त प्रतियोगिता मेची विद्योदय आधारभूत विद्यालयको खेलमैदान र शान्ति बन बाटिकाको खेलमैदानमा हुनेछ । प्रतियोगिता सम्पन्न गर्नका लागि अहिले तयारीमा जुटिरहेको समेत आयोजकले जनाएको छ ।
पत्रकार भेटघाट कार्यक्रममा क्लबका उपाध्यक्ष शंकर धिमाल, सचिव जित धिमाल, उप–सचिव विशोक श्रेष्ठ, सञ्चार प्रतिष्ठान मेचीनगरका अध्यक्ष शिशिर चम्लागाईँ, प्रेस क्लब मेचीनगरका निवर्तमान अध्यक्ष डम्बर बराल, अध्यक्ष प्रकाश पौडेल, कैलाश प्रधान लगायतको उपस्थिति रहेको थियोे ।