मेचीनगर । पाँचौं मेचीनगर गोल्डकपको उपाधिका लागि शनिबार शीर्ष डिभिजन च्याम्पियन चर्च ब्वाइज युनाइटेडले आयोजक काँकरभिट्टा फुटबल ट्रेनिङ सेन्टरको सामना गर्दैछ ।
दुवै टोली पहिलो पटक प्रतियोगिताको उपाधि जित्ने लक्ष्यका साथ मैदान उत्रिनेछन् । खेल काँकरभिट्टा मैदानमा दिउँसो ३ बजे सुरु हुनेछ ।
फाइनलअघि शुक्रबार आयोजित पत्रकार सम्मेललनमा दुवै टोलीले उपाधि जित्ने दाबाी गरे ।
चर्च ब्वाइजका प्रशिक्षक सुमन श्रेष्ठ घरेलु टोलीविरुद्ध खेल्न गाह्रो हुने भए पनि उपाधि जित्नेमा विश्वस्त रहेको बताउँछन् । ‘घरेलु टोलीविरुद्ध त्यती सहज हुने छैन । तर हामी उपाधिका लागि खेल्ने छौं । लगातारको खेलले खेलाडी थाकिरहेका छन् । आज विश्राम पाउँदा केही रहात महसुस भएको छ । उपाधिका साथ मोसफल टुंगाउने लक्ष्य छ । हामी त्यसमै केन्द्रित छौं,’ प्रशिक्षक श्रेष्ठले भने ।
चर्च ब्वाइज युनाइटेडले यो वर्ष मोफसलका तीन प्रतियोगितको उपाधि उचालिसकेको छ । टोली झापा, फाल्गुनन्द र बागमती गोल्डकपको च्याम्पियन हो ।
यो प्रतियोगिताको पहिलो खेलमा चर्च ब्वाइजले नेपाल सुपर लिग (एनएसलए) टोली झापा एफसीलाई सडन डेथमा ५–४ हराएको थियो । यस्तै टोलीले सेमिफाइनलमा शीर्ष डिभिजन प्रतिद्धन्द्धी मच्छिन्द्र फुटबल क्लबविरुद्ध ४–३ को पुनरागमन जीत निकालेको थियो ।
मच्छिन्द्रविरुद्ध तीन गोलले पछि परेको अवस्थालाई उल्टाउँदै चर्च ब्वाइजले खेल आफ्नो पक्षमा पारेको थियो । त्यसैले पनि टोली उच्च मनोबलका साथ मैदान उत्रिनेछ ।
यता काँकरभिट्टाका प्रशिक्षक मुन्ना सुब्बा उपाधि घरमै राख्ने लक्ष्य रहेको बताउँछन् । ‘हामी फाइनलका लागि तयार छौं । राम्रा खेलाडी रहेकाले टोली उपाधि जित्न सक्षम पनि छ । लिग च्याम्पियन चर्च ब्वाइजविरुद्ध खेल्न गाह्रो हुनेछ । तर हामी घरेलु मैदान र समर्थकको फाइदा उठाउँदै च्याम्पियन बन्ने लक्ष्यमा छौं’ प्रशिक्षक सुब्बाले भने ।
काँकरभिट्टा वर्षको पहिलो उपाधि जित्न चाहन्छ । काँकरभिट्टाले पहिलो खेलमा भारतीय टोली जर्जियन एफसीलाई ४–२ ले पराजित गरेको थियो ।
त्यस्तै धरान एफसीलाई सडन डेथमा ५–४ ले पराजित गर्दै उपाधि नजिक पुगेको हो ।
प्रतियोगिताको विजेताले १० तथा उपविजेताले ५ लाख रुपौयाँ प्राप्त गर्नेछन् । यस्तै सर्वोकृष्ट खेलाडीलाई ५१ हजार, सर्वाधिक गोलकर्तालाई २५ हजार, उत्कृष्ट गोलकिपर र प्रशिक्षकलाई समान २१ हजार तथा उदियमान खेलाडीलाई १५ हजार रुपौयाँ प्रदान गरिनेछ ।