मेचीनगर । नकलबन्दा स्पोर्टिङ क्लबको आयोजनामा भोलिदेखि हुने नगरस्तरीय नकआउट फुटबल प्रतियोगिताको सम्पूर्ण तयारी पूरा भएको छ । प्रतियोगिताको सम्पूर्ण तयारी पूरा भएको आज सम्पन्न पत्रकार सम्मेलनमार्फत जानकारी गराइएको हो ।
मेचीनगर–५ स्थित नकलबन्दामा यही फागुन ७ गतेदेखि १७ गतेसम्म सञ्चालन हुने छ । प्रतियोगिताको उद्घाटन रातेखाल युवा क्लब अर्जुनधारा र दिपज्योति फुटबल क्लब बाहुण्डाँगीबीच हुने आयोजकले जनाएको छ । प्रतियोगितामा १० वटा टिमको सहभागिता रहनेछ भने प्रतियोगिताको विजेता र उपविजेताले क्रमशः नगद ५० हजार र ३० हजारसहित ट्रफी, मेडल र प्रमाण पत्र प्राप्त गर्नेछन् ।
प्रतियोगिताको प्रथम पुरस्कार स्वर्गीय कार्गिल विजयवीर सहिद सुरेश क्षेत्रीको परिवारबाट प्राप्त भएको छ भने दोश्रो पुरस्कार स्व. टंक बहादुर देवकोटाको स्मृतिमा देवकोटा परिवारबाट प्राप्त भएको छ । प्रतियोगिताको प्रायोजकमा नकलबन्दा बचत तथा ऋण सहकारी संस्था लि. रहेको छ भने सहयोगी संस्थाहरुमा गंगा मेमोरियल इङ्लिस स्कुल र मेची आधारभुत विद्यालय रहेका छन् ।
प्रतियोगिता अन्तर्गत विभिन्न विधामा समेत खेलाडीहरुलाई अवार्ड प्रदान गरिनेछ । प्रत्येक खेलका म्यान अफ द म्याचलाई नगद १ हजार, उत्कृष्ट गोलकिपरलाई ३ हजार १ सय, प्लेयर अफ द टुनामेन्टलाई २ हजार १ सय र सर्वाधिक गोलकर्तालाई २ हजार १ सयसँगै मेडल र प्रमाण पत्र प्रदान गरिने आयोजकले जानकारी दिएको छ ।