मेचीनगर । यलम्बर एफसी र थन्डर्स एफसी ‘बी’ प्रथम टोकला नकआउट फुटबल प्रतियोगिताको सेमिफाइनल प्रवेश गरेका छन् । यलम्बर एफसीले थन्डर्स एफसी ‘ए’ लाई तथा थन्डर्स एफसी ‘बी’ ले नकलबन्दा एफसीलाई हराउँदै सेमिफाइनल यात्रा तय गरेको हो ।
आइतबार सम्पन्न पहिलो क्वाटरफाइनल खेलमा थन्डर्स एफसीलाई ० का विरुद्ध २ गोल गर्दै यलम्बर एफसी विजयी बनेको हो । यलम्बर एफसीका लागि जर्सी नम्बर ७ का जुसाङ नेम्बाङले एक गोल गरेका थिए भने एक आत्मघाती गोल उपहार पाएको थियो । खेलको म्यान अफ द म्याच यलमबर एफसीका जुसाङ नेम्बाङ घोषित भए ।
त्यसैगरी, दोश्रो खेलमा थन्डर्स एफसी ‘बी’ले नकलबन्दा एफसीलाई टाइब्रेरमा हराएको थियो । निर्धारित समयमा २–२ गोल भएपछि खेल टाइब्रेकरबाट निर्णय भएको थियो । पेनाल्टी सुटआउटमा नकलबन्दा एफसीको ४ प्रहार गोलमा परिणत भयो भने एउटा प्रहार खेलको म्यान अफ द म्याच विपक्षी गोलरक्षक अंकित उराँवले बचाएका थिए । थन्डर्स एफसीका सबै प्रहार गोलमा परिणत भएको थियो ।
खेलमा थन्डर्स एफसी ‘बी’ का अजय तामाङले एक गोल गरेका थिए भने एक आत्मघाती गोल उपहार पाएका थिए । नकलबन्दा एफसीका लागि दुवै गोल राज क्षेत्रीले गरेका थिए ।