मेचीनगर-झापाको मेचीनगरमा रहेको नवज्योति माध्यमिक विद्यालयका शिक्षक धनराज भण्डारीको निन्दा खोलामा पौडी खेल्दा डुबेर मृत्यु भएकोे छ ।

मेचीनगर ३ स्थित बडाखाल निवासी ४० वर्षीय भण्डारी आज दिउँसो पौडी खेल्ने क्रममा डुबेर बेहोश भएका थिए ।

उनलाई उद्धार गरी उपचारका लागि बिर्तामोडस्थित बिएन्डसी अस्पताल पुर्याइएको थियो । उपचारकै क्रममा उनको मृत्यु भएको जिल्ला प्रहरी कार्यालय झापाले जनाएको छ ।

घटना कसरी घट्यो त? यो पनि पढ्नुहोस

मेचीनगर–३ स्थित बडाखाल निवासी ४० वर्षीय शिक्षक धनराज भण्डारीले १२ वर्ष र ८ वर्षका २ जना छोराहरुलाई लिएर दोकानडाडा चोक पश्चिम निन्दा खोलामा दिउँसो पौडी खेल्न गएका थिए ।

स्थानीयका अनुसार पौडी खेल्ने क्रममा कान्छो छोरा ८ वर्षका पौडी खेलेर छेउमा बसिरहेका थिए । जेठो छोरा पौडी खेल्ने क्रममा अलिक गहिरो भएको पानीमा पुगेपछि पौडी खेल्न समस्या भयो ।

नजिकै रहेका उनका बुबा भण्डारीले छोरालाई समस्या परेको देखेपछि उनी छोरालाई बचाउँन खोलामा हमफाले । छोरालाई कसो कसो गरेर किनारमा धकेलेर पठाए । तर, आफु चाहिँ गहिरो भएको पानीमा पौडी खेल्न नसकेर डुवे ।

बुबा डुवेर पौडी खेल्न नसकेपछि बेहोस भएका थिए । छोराहरुले स्थानीयलाई हारगुहार गरे । त्यतिखेर करिव १ वजेको थियो ।

तत्काल स्थानीयहरु आएर भण्डारीलाई उपचारका लागि बिर्तामोड स्थित वीएण्डसी अस्पताल लगिएको थियो । भण्डारीलाई साढे २ वजे अस्पतालले मृत घोषणा गरेको थियो ।